– 15 ಜನವರಿ 2023 :
ಎಂ. ಜಿ. ಹೆಗಡೆಯವರ ‘ ಮಿನುಗು ನೋಟ’ ಕೃತಿಯನ್ನು ಬಿಡುಗಡೆ ಮಾಡಿದ ನಂತರ ಸುಧೀಂದ್ರ ಕುಲಕರ್ಣಿ ಅವರು ಗಾಂಧಿ ವಿಚಾರ ವೇದಿಕೆಯಲ್ಲಿ ಆಡಿದ ಮಾತುಗಳು.

ಗಾಂಧೀಜಿಯವರ ಕುರಿತ ದುರಾಗ್ರಹದ ಪ್ರಶ್ನೆಗಳಿಗೆ ಉತ್ತರ ರೂಪಿಯಾಗಿ ಎಂ. ಜಿ.‌ಹೆಗಡೆಯವರು ಬರೆದಿರುವ ಪುಸ್ತಕ ' ಮಿನುಗು ನೋಟ' (128 ಪುಟ) ದ ಮುಖ ಬೆಲೆ:₹130/-.
ಒಂದು ಪುಸ್ತಕವನ್ನು ಅಂಚೆಯಲ್ಲಿ ತರಿಸಿಕೊಳ್ಳುವುದಾದರೆ:₹ 120/-

ಕನಿಷ್ಠ 25 ಪುಸ್ತಕಗಳನ್ನು ತರಿಸಿಕೊಳ್ಳುವುದಾದರೆ 1 ಪುಸ್ತಕಕ್ಕೆ ₹ 75+ ಸಾಗಾಣಿಕಾ ವೆಚ್ಚದಂತೆ ಕಳಿಸಿಕೊಡಲಾಗುವುದು.
50 ಮತ್ತು ಅದಕ್ಕಿಂತ ಹೆಚ್ಚು ಪುಸ್ತಕಗಳನ್ನು ತರಿಸಿಕೊಳ್ಳುವುದಾದರೆ ಒಂದು ಪುಸ್ತಕಕ್ಕೆ ₹ 75( ಸಾಗಾಣಿಕ ವೆಚ್ಚ ರಹಿತ) ರಂತೆ ಕಳಿಸಲಾಗುವುದು.

ಈ ಬಗ್ಗೆ ಗೂಗಲ್ ಪೇ ಮತ್ತು ಸಂಪರ್ಕಕ್ಕಾಗಿ: 
ಮಹೇಶ್ ಯು. ಎಸ್. [Roopa Publishers]
9342274331

ವರದಿ:

ಹಿಂದೂ ವಿರೋಧಿಯಲ್ಲದ ಜಾತ್ಯತೀತತೆ, ಮುಸ್ಲಿಂ ವಿರೋಧಿಯಲ್ಲದ ಹಿಂದುತ್ವದ ಅಗತ್ಯವಿದೆ: ಸುಧೀಂದ್ರ ಕುಲಕರ್ಣಿ

ಮಂಗಳೂರು, ಜ. 15: ಹಿಂದೂ ವಿರೋಧಿಯಲ್ಲದ ಜಾತ್ಯತೀತತೆ, ಮುಸ್ಲಿಂ ವಿರೋಧಿಯಲ್ಲದ ಹಿಂದುತ್ವ ಎಂದು ಸೂತ್ರ ರೂಪದಲ್ಲಿ ಅರವಿಂದ ಚೊಕ್ಕಾಡಿಯವರು ಹೇಳಿದ ಗಾಂಧಿ ವಿಚಾರ ವೇದಿಕೆಯ ಧ್ಯೇಯ ವರ್ತಮಾನದ ಅಗತ್ಯವಾಗಿದೆ. ಗಾಂಧೀಜಿಯವರ ಮೇಲಿನ ಅಪಪ್ರಚಾರಕ್ಕೆ ಉತ್ತರಿಸುವುದು ಅವಶ್ಯವಿದೆ. ಈ ನಿಟ್ಟಿನಲ್ಲಿ ಎಂ. ಜಿ. ಹೆಗಡೆಯವರು ಬರೆದಿರುವ, ‘ ಮಿನುಗು ನೋಟ’ ಅಗತ್ಯವಾದ ಕೃತಿಯಾಗಿದೆ ಎಂದು ತನ್ನ ಪಕ್ಷದ ಧ್ಯೇಯವನ್ನು ‘ ಗಾಂಧಿ ಪ್ರಣೀತ ಸಮಾಜವಾದ’ ಎಂದು ಘೋಷಿಸಿದ್ದ ಮಾಜಿ ಪ್ರಧಾನಿ ಅಟಲ್ ಬಿಹಾರಿ ವಾಜಪೇಯಿ ಅವರ ಸಲಹೆದಾರರಾಗುದ್ದ, ಪ್ರಸಿದ್ಧ ಅಂಕಣಕಾರ ಸುಧೀಂದ್ರ ಕುಲಕರ್ಣಿ ಹೇಳಿದರು. ಅವರು ಗಾಂಧಿ ವಿಚಾರ ವೇದಿಕೆಯ ಪರಿಕಲ್ಪನೆಯಾದ ಗಾಂಧೀಜಿಯವರ ಮೇಲಿನ ಅಪಪ್ರಚಾರಗಳಿಗೆ ಉತ್ತರ ರೂಪವಾಗಿ ಎಂ. ಜಿ. ಹೆಗಡೆಯವರು ಬರೆದಿರುವ, ರೂಪ ಪ್ರಕಾಶನದವರು ಪ್ರಕಟಿಸಿರುವ ‘ ಮಿನುಗು ನೋಟ’ ಪುಸ್ತಕವನ್ನು ಇಂದು ಇಲ್ಲಿ ಬಿಡುಗಡೆಗೊಳಿಸಿ ಮಾತನಾಡುತ್ತಿದ್ದರು.

ಮಹಾತ್ಮಾ ಗಾಂಧಿಯವರು ಮಹಾ ನಾಯಕ. ಆದರೆ ಅವರೂ ವಿಮರ್ಶೆಗೆ ಅರ್ಹರೇ. ಆದರೆ ವಿಮರ್ಶೆ ಎಂದರೆ ಅಪಪ್ರಚಾರವಲ್ಲ. ಆರ್.‌ಎಸ್. ಎಸ್. ನ ಮೋಹನ್ ಭಾಗ್ವತ್ ಅವರು ಗಾಂಧೀಜಿಯನ್ನು ಹೊಗಳುತ್ತಾರೆ. ಆದರೆ ಅವರ ಸ್ವಯಂಸೇವಕರು ಗಾಂಧೀಜಿಯನ್ನು ನಿಂದಿಸುತ್ತಾರೆ.‌ ಆಗ ನೀವು ನಿಮ್ಮ ಸ್ವಯಂ ಸೇವಕರಿಗೆ ಗಾಂಧೀಜಿಯ ಮೇಲೆ ಅಪಪ್ರಚಾರ ಮಾಡಬಾರದು ಎಂದು ಹೇಳಬೇಕು. ಅಥವಾ ನಿಮ್ಮ ನಿಜವಾದ ನಿಲುವು ಏನು ಎಂದು ಹೇಳಬೇಕು. ದೇಶ ವಿಭಜನೆಗೆ ಗಾಂಧಿ ಕಾರಣರಲ್ಲ. ಮುಸ್ಲಿಂ ಲೀಗ್ ಮತ್ತು ಬ್ರಿಟಿಷರು ಕಾರಣ. ಮುಸ್ಲಿಂ ಲೀಗಿನ ದೇಶ ವಿಭಜನೆಯ ಪ್ರಸ್ತಾವನೆಯನ್ನು ಸಾವರ್ಕರ್ ಒಪ್ಪಿದ್ದರು. ಆದರೆ ಗಾಂಧಿ ಒಪ್ಪಿರಲಿಲ್ಲ. ಆದರೂ ಆರೋಪ ಗಾಂಧಿಯ ಮೇಲೆ ಮಾಡುವುದು ಸಮಂಜಸವಲ್ಲ. ಖಿಲಾಫಟ್ ಚಳವಳಿಯಲ್ಲಿ ಗಾಂಧೀಜಿಯೊಂದಿಗಿದ್ದ ಆಲಿ ಸಹೋದರರು 1924 ರಲ್ಲಿ ಕಹುಟದಲ್ಲಿ ನಡೆದ ಕೋಮುಗಲಭೆಗೆ ಮುಸ್ಲಿಂ ಕೋಮುವಾದಿಗಳು ಕಾರಣ ಎಂದು ಗಾಂಧೀಜಿ ಹೇಳಿದ್ದಕ್ಕಾಗಿ ಗಾಂಧೀಜಿಯಿಂದ ದೂರವಾದರು.

ಹಾಗೆ ನೋಡಿದರೆ ಗಾಂಧೀಜಿಯ ಮೇಲೆ ಮೊದಲು ಅಪಪ್ರಚಾರ ಪ್ರಾರಂಭಿಸಿದ್ದು ಕಮ್ಯುನಿಸ್ಟರು. ಕೆಲವೊಮ್ಮೆ ಅಂಬೇಡ್ಕರ್‌ವಾದಿಗಳೂ ಗಾಂಧೀಜಿಯ ಮೇಲೆ ಅಪಪ್ರಚಾರ ನಡೆಸಿದ್ದಾರೆ.‌ ಇತ್ತೀಚೆಗೆ ಆಫ್ರಿಕಾದಲ್ಲಿ ಗಾಂಧೀಜಿ ಕರಿಯರ ವಿರುದ್ದ ಇದ್ದರು ಎಂದು ಅಪಪ್ರಚಾರ ನಡೆದಿತ್ತು. ದಕ್ಷಿಣ ಆಫ್ರಿಕಾದಲ್ಲಿ ಗಾಂಧೀಜಿ ಕರಿಯರ ಅಭ್ಯುದಯಕ್ಕಾಗಿ ಎಷ್ಟು ಕೆಲಸ ಮಾಡಿದ್ದಾರೆ, ಇಲ್ಲಿ ದಲಿತ ಅಭಿವೃದ್ಧಿಗಾಗಿ ಎಷ್ಟು ಕೆಲಸ ಮಾಡಿದ್ದಾರೆ ಎಂದು ಗೊತ್ತಿಲ್ಲದವರು ಆಡುವ ಮಾತುಗಳಿವೆ. ಗಾಂಧೀಜಿಯನ್ನು ಹಿಂದೂ ವಿರೋಧಿ ಎನ್ನುವುದು ಮತ್ತೊಂದು ಅಪಪ್ರಚಾರ. ಜೀವನದುದ್ದಕ್ಕೂ ರಾಮನಾಮವನ್ನು ಜಪಿಸಿದ ಗಾಂಧೀಜಿ ಒಬ್ಬ ಶ್ರೇಷ್ಠ ಹಿಂದೂ ಆಗಿದ್ದರು. ಅವರು ನಮ್ಮ ಋಗ್ವೇದ ಹೇಳುವ,”ಅನೌ ಭದ್ರಾ ಕೃತವೋ ಯಂತು ವಿಶ್ವತಃ” ಎನ್ನುವ ಮಾತನ್ನು ಅಳವಡಿಸಿಕೊಂಡಿದ್ದರು. ಅವರ ಸತ್ಯಾಗ್ರಹದ ಪರಿಕಲ್ಪನೆಯ ಹಿಂದೆ ಇಸ್ಲಾಮಿನ ಪ್ರೇರಣೆಯೂ ಇದೆ.

ಸ್ವಾತಂತ್ರ್ಯ ಹೋರಾಟದಲ್ಲಿ ಅನೇಕ ನಾಯಕರುಗಳಿದ್ದರು. ಸಾವರ್ಕರ್ ಅವರೂ ಸ್ವಾತಂತ್ರ್ಯ ಹೋರಾಟ ಮಾಡಿ ಕಠಿಣ ಶಿಕ್ಷೆಯನ್ನು ಅನುಭವಿಸಿದ್ದರು. ಇವತ್ತು ನಮ್ಮ‌ ನಾಯಕನಿಗೆ ಏನೂ ಹೇಳಬಾರದು. ಗಾಂಧೀಜಿಯನ್ನು ಹೇಗೆ ಬೇಕಾದರೂ ನಿಂದಿಸಬಹುದು ಎಂದಾಗಿದೆ. ಇದನ್ನು ಪ್ರಶ್ನಿಸಬೇಕು. ಆದರೆ ಪ್ರಶ್ನಿಸುವುದು ಮಾತ್ರ ಗಾಂಧಿ ವಿಚಾರ ವೇದಿಕೆಯ ಕೆಲಸವಾಗಬಾರದು. ರಚನಾತ್ಮಕ ಕಾರ್ಯಗಳಿಗೆ ತೊಡಗಬೇಕು. ಆರ್.‌ಎಸ್.‌ಎಸ್. ನವರೊಂದಿಗೂ ಗಾಂಧಿ ವಿಚಾರ ವೇದಿಕೆ ಸಂವಾದ ನಡೆಸಬೇಕು.‌ ರಚನಾತ್ಮಕ ಕಾರ್ಯಗಳಿಗೆ ಗಾಂಧೀಜಿಯೇ ಮುಖ್ಯರಾಗಿದ್ದಾರೆ.‌ನಮ್ಮ ಪ್ರಧಾನ ಮಂತ್ರಿಗಳಾದ ನರೇಂದ್ರ ಮೋದಿಯವರು ಸ್ವಚ್ಛ ಭಾರತದ ಪರಿಕಲ್ಪನೆಗೆ ಚಾಲನೆ ಕೊಡುವಾಗ ಗಾಂಧೀಜಿಯನ್ನೆ ರಾಯಭಾರಿಯಾಗಿ ತೆಗೆದುಕೊಂಡರು. ಸ್ವಾತಂತ್ರ್ಯಕ್ಕಿಂತಲೂ ಸ್ವಚ್ಛತೆ ಮುಖ್ಯ ಎನ್ನುವಷ್ಟು ಸ್ವಚ್ಛತೆಯ ಬಗ್ಗೆ ಕಾಳಜಿ ಇದ್ದವರು ಗಾಂಧೀಜಿ.‌

ಗಾಂಧಿ ವಿಚಾರ ವೇದಿಕೆ ಮಂಗಳೂರಿನ ವ್ಯಾಸ ಪೀಠ ಇರಬಹುದೆಂದು ನಾನು ಅಂದುಕೊಂಡಿದ್ದೆ. ಆದರೆ ಗುಲ್ಬರ್ಗ, ಬೆಂಗಳೂರು, ಕೊಪ್ಪಳ, ತೀರ್ಥಹಳ್ಳಿ, ವಿಜಾಪುರದಿಂದೆಲ್ಲ ಬಂದವರನ್ನು ನೋಡಿದಾಗ ಇದು ಇಡೀ ರಾಜ್ಯದ ವೇದಿಕೆ ಎಂದು ಗೊತ್ತಾಯಿತು. ಅಥಣಿಯಲ್ಲಿ ಇದರ ಒಂದು ಘಟಕವನ್ನು ಮಾಡಲು ನಾನು ಬದ್ಧನಿದ್ದೇನೆ. ದಕ್ಷಿಣ ಕನ್ನಡದಲ್ಲಿ ಇದು ಹೆಚ್ಚು ಕ್ರಿಯಾಶೀಲವಿರಬೇಕಾಗಿದೆ. ರಾಷ್ಟ್ರದ ಅಭಿವೃದ್ಧಿಗೆ ದಕ್ಷಿಣ ಕನ್ನಡ ಅಪಾರ ಕೊಡುಗೆ ಕೊಟ್ಟಿದೆ. ಇಲ್ಲಿಯೇ ಕೋಮುಗಲಭೆಗಳು ನಡೆಯುವುದು ಬೇಸರದ ಸಂಗತಿ. ಕೋಮುವಾದಕ್ಕೆ ಆಸ್ಪದ ಕೊಡಬೇಡಿ ಎಂದು ನಾನು ನನ್ನ ಹಿಂದೂ ಬಾಂಧವರಲ್ಲಿ ಮನವಿ ಮಾಡುತ್ತೇನೆ. ಅದೇ ರೀತಿ ಮುಸ್ಲಿಮರಲ್ಲೂ ಕೋಮುವಾದ ಇದೆ. ಮುಸ್ಲಿಮರೂ ತಮ್ಮಲ್ಲಿನ ಕೋಮುವಾದವನ್ನು ವಿರೋಧಿಸಬೇಕು ಎಂದು ಮುಸ್ಲಿಂ ಬಾಂಧವರಲ್ಲೂ ಮನವಿ ಮಾಡುತ್ತಿದ್ದೇನೆ.

ಗಾಂಧಿ ವಿಚಾರ ವೇದಿಕೆಯ ಅಧ್ಯಕ್ಷ ಶ್ರೀಧರ ಭಿಡೆಯವರು ಅವರ ಗಾಂಧಿವಾದಿ ಅಜ್ಜನ ಬಗ್ಗೆ ಬರೆಯುತ್ತಾ ಹೇಳಿದ ಮಾತುಗಳು ಎಂಥ ಉದಾತ್ತ ಚಿಂತನೆ ಉಳ್ಳವರು ನಾರಾಯಣ ಭಿಡೆಯವರಾಗಿದ್ದರು ಎಂದು ಸೂಚಿಸುತ್ತದೆ. ಎಂ. ಜಿ. ಹೆಗಡೆಯವರು ಇಂದಿನ ಅಗತ್ಯವೊಂದನ್ನು ಪೂರೈಸಿಕೊಟ್ಟಿದ್ದಾರೆ. ಅವರನ್ನು ನಾನು ಅಭಿನಂದಿಸುತ್ತೇನೆ ಎಂದು ಸುಧೀಂದ್ರ ಕುಲಕರ್ಣಿ ನುಡಿದರು.

ಗಾಂಧಿ ವಿಚಾರ ವೇದಿಕೆಯ ಅಧ್ಯಕ್ಷ ಶ್ರೀಧರ ಭಿಡೆ ಅಧ್ಯಕ್ಷತೆ ವಹಿಸಿದ್ದರು.‌ಆಡಳಿತಾಧಿಕಾರಿ ಭಾಗ್ಯೇಶ್ ರೈ ಸ್ವಾಗತಿಸಿದರು. ಉಪಾಧ್ಯಕ್ಷ ಅಣ್ಣಾ ವಿನಯಚಂದ್ರ ಮಾತನಾಡಿದರು. ಗಾಂಧಿ ವಿಚಾರ ವೇದಿಕೆಯ ಮಂಗಳೂರು ಘಟಕದ ಗೌರವಾಧ್ಯಕ್ಷೆ ಬಿ.‌ಎಂ.‌ರೋಹಿಣಿ ವಂದಿಸಿದರು. ಈ ಸಂದರ್ಭದಲ್ಲಿ ಕೃತಿಯ ಲೇಖಕ ಎಂ.‌ಜಿ.‌ಹೆಗಡೆ, ಮತ್ತು ಅವರ ಪತ್ನಿ ಲಕ್ಷ್ಮೀ ಹಾಗೂ ಗಾಂಧಿ ವಿಚಾರ ವೇದಿಕೆಗೆ ಹಲವು ಬಾರಿ ಹಣದ ನೆರವು ನೀಡಿದ ಎಂ. ಕೆ. ಸುಬ್ರಹ್ಮಣ್ಯ ಅವರನ್ನು ಸಂಮ್ಮಾನಿಸಲಾಯಿತು.‌ ಹಣಕಾಸು ನೆರವು ನೀಡುದ ವಿಜಯೇಂದ್ರ ಪಾಟೀಲ್, ಗುರುರಾಜ್ ಎನ್ ಅವರನ್ನು ಗುರುತಿಸಲಾಯಿತು. ವೇದಾ ಅಠವಳೆ ಅವರು ರಚಿಸಿದ ಗಾಂಧಿ ವಂದನ ಗೀತೆಯನ್ನು ಕು| ಚಿರಶ್ರೀ ಹಾಡಿದರು.

ಈ ಸಂದರ್ಭದಲ್ಲಿ ಸುಧೀಂದ್ರ ಕುಲಕರ್ಣಿ ಅವರೊಂದಿಗೆ ಸಂವಾದ ನಡೆಸಲಾಯಿತು. ಸಂವಾದದಲ್ಲಿ ಮಂಗಳೂರು ವಿವಿ ಪ್ರಾಧ್ಯಾಪಕರ ಸಂಘದ ಅಧ್ಯಕ್ಷ ಡಾ.‌ ಜೋಸೆಫ್ ಎನ್. ಎಂ, ಸಾಮಾಜಿಕ ಕಾರ್ಯಕರ್ತೆ ಸ್ವರ್ಣ ಭಟ್, ಕವಿ ಸುಬ್ರಾಯ ಚೊಕ್ಕಾಡಿ, ಸಂಶೋಧಕ ಡಾ.‌ಕೆ. ಚಿನ್ನಪ್ಪ ಗೌಡ, ವೈದ್ಯರಾದ ಡಾ.‌ಮುರಳೀಮೋಹನ, ಡಾ.‌ಕುಶ್ವಂತ್ ಕೋಳಿಬೈಲು, ಪ್ರೊ. . ಬಾಲಚಂದ್ರ ಗೌಡ, ಡಾ. ಶಿವಪ್ರಕಾಶ್ ಎನ್, ವಿದ್ಯಾ ನಾಯಕ್, ವಿವೇಕಾನಂದ ಕಾಮತ್, ಎ.‌ಕೆ.‌ಕುಕ್ಕಿಲ, ಅಬ್ದುಲ್ ಮುನೀರ್, ಮಾಜಿ ಸಚಿವ ರಮಾನಾಥ ರೈ, ಮಾಜಿ ಶಾಸಕ ಜೆ. ಆರ್.‌ಲೋಬೋ, ಡಾ.‌ಸುರೇಶ ನೆಗಳಗುಳಿ, ರೇಮಂಡ್ ತಾಕೊಡೆ, ನೀಲಾವರ ಸುರೇಂದ್ರ ಅಡಿಗ, ಸೋಮಪ್ರಕಾಶ್ ಬೆಂಗಳೂರು, ನೇತಾಜಿ ಗಾಂಧಿ ವಿಜಾಪುರ, ಗಿರೀಶ್ ಪಾಟೀಲ್ ಗುಲ್ಬರ್ಗ, ಹರಿಪ್ರಸಾದ್ ಅಡ್ಪಂಗಾಯ, ಬಸವರಾಜ ಸವಡಿ ಕೊಪ್ಪಳ, ರಮೇಶ್ ಶೆಟ್ಟಿ ಮತ್ತು ಮಂಜುನಾಥ್ ತೀರ್ಥಹಳ್ಳಿ, ರೇಮಂಡ್ ಡಿಕೂನ ತಾಕೊಡೆ, ಡಾ. ಉದಯ ಕುಮಾರ್ ಇರ್ವತ್ತೂರು, ಒ.‌ಆರ್. ಪ್ರಕಾಶ್, ಡಾ. ಪೂವಪ್ಪ‌ ಕಣಿಯೂರು, ಲಕ್ಷ್ಮೀಶ ಗಬಲಡ್ಕ, ಝೇವಿಯರ್ ಡಿಸೋಜಾ, ಪೃಥ್ವೀರಾಜ ಶೆಟ್ಟಿ, ನವೀನ್ ರೈ, ಉಮ್ಮರ್ ಬ್ಯಾರಿ ಸಾಲೆತ್ತೂರು ಮುಂತಾದವರು ಭಾಗವಹಿಸಿದ್ದರು.