ಗಾಂಧಿ ವಿಚಾರ ವೇದಿಕೆಗೆ ತಮಗೆ ಸ್ವಾಗತ.

ಗಾಂಧಿ ವಿಚಾರ ವೇದಿಕೆಯ ಬ್ಲಾಗ್ , ಲೇಖನಗಳು , ವರದಿಗಳು , ಐತಿಹಾಸಿಕ ಸತ್ಯಾಂಶಗಳು ಮತ್ತು ಸಂಭಂದಿತ ವೀಡಿಯೋಗಳನ್ನು ಇಲ್ಲಿ ಪ್ರಸ್ತುತಪಡಿಸಿದೆ.

---

ಗಾಂಧಿ ವಿಚಾರ ವೇದಿಕೆ: ಪರಿಚಯ

• – ಅರವಿಂದ ಚೊಕ್ಕಾಡಿ

ಸಾಮಾನ್ಯವಾಗಿ ಸಮಾಜ ಸೇವೆಯ ಕಾರ್ಯಕ್ರಮಗಳು ಭೌತಿಕ ರೂಪದ ಸೌಲಭ್ಯಗಳನ್ನು ಅಗತ್ಯವಿರುವವರಿಗೆ ಒದಗಿಸುವ ರೀತಿಯದ್ದಾಗಿದ್ದು ಈ ಕೆಲಸವನ್ನು ಸಾಕಷ್ಟು ಸಂಘಟನೆಗಳು ಮಾಡುತ್ತಿವೆ. ಆದರೆ ಸಮಾಜಕ್ಕೆ ಬೌದ್ಧಿಕ ಸೇವೆಯ ಅಗತ್ಯವೂ ಇದ್ದು ಮನುಷ್ಯರು ಮಾನವ ಸಂಪನ್ಮೂಲವಾಗಿ ಬೆಳೆಯಬೇಕಾದ ಅಗತ್ಯವಿದೆ. ಈ ನಿಟ್ಟಿನಲ್ಲಿ ಕಾರ್ಯನಿರ್ವಹಿಸುವುದಕ್ಕಾಗಿ ಹುಟ್ಟಿಕೊಂಡಿರುವುದೇ ಗಾಂಧಿ ವಿಚಾರ ವೇದಿಕೆ.

ವೇದಿಕೆಯ ಕೇಂದ್ರ ಕಛೇರಿಯು ದಕ್ಷಿಣ ಕನ್ನಡ ಜಿಲ್ಲೆಯ ಪುತ್ತೂರಿನಲ್ಲಿರುವ ‘ವಿದ್ಯಾಮಾತಾ ಅಕಾಡೆಮಿ’ ಯಲ್ಲಿದೆ. ಇದು ಟ್ರಸ್ಟ್ ಕಾಯ್ದೆಯ ಅನುಸಾರವಾಗಿ 11 ನವಂಬರ್ 2021 ರಂದು ನೋಂದಾವಣೆಗೊಂಡಿದ್ದು ಐದು ಮಂದಿ ಟ್ರಸ್ಟಿಗಳನ್ನು ಸ್ಥಾಪಕ ಸದಸ್ಯರಾಗಿ ಹೊಂದಿದೆ. ಈ ಟ್ರಸ್ಟ್ ವೇದಿಕೆಯ ಎಲ್ಲ ರೀತಿಯ ಕಾರ್ಯಗಳನ್ನು ನಿರ್ವಹಿಸುವ ಕೇಂದ್ರ ಸಮಿತಿಯಾಗಿ ಗಾಂಧಿ ವಿಚಾರ ವೇದಿಕೆಯ ಮಾತೃ ಸಮಿತಿಯನ್ನು ಸೃಷ್ಟಿಸಿದೆ. ಮಾತೃ ಸಮಿತಿಯ ಅಧೀನದಲ್ಲಿ ಗಾಂಧಿ ವಿಚಾರ ವೇದಿಕೆಯ ಘಟಕಗಳು ಕಾರ್ಯ ನಿರ್ವಹಿಸುತ್ತವೆ. ಮಾತೃ ಸಮಿತಿ ಮತ್ತು ಘಟಕಗಳ ಪದಾಧಿಕಾರಿಗಳು ಐದು ವರ್ಷಗಳ ವರೆಗೆ ಅಧಿಕಾರದಲ್ಲಿರುತ್ತಾರೆ. ನಂತರ ಸರ್ವಾನುಮತದಿಂದ ಮುಂದಿನ ಪದಾಧಿಕಾರಿಗಳ ಆಯ್ಕೆಯನ್ನು ಮಾಡಲಾಗುತ್ತದೆ. ಅನಿವಾರ್ಯವಾದಲ್ಲಿ ಚುನಾವಣೆಯನ್ನೂ ನಡೆಸಬಹುದು. ಆದರೆ ಪದಾಧಿಕಾರಿಗಳ ಆಯ್ಕೆಯು ಟ್ರಸ್ಟ್‌ಗೆ ತೃಪ್ತಿಕರವಾಗಿ ಕಾಣಿಸಬೇಕು. ಟ್ರಸ್ಟಿಗಳ ದೃಷ್ಟಿಯಲ್ಲಿ ಆಯ್ಕೆಯು ಅತೃಪ್ತಿಕರವಾಗಿದ್ದರೆ ಪ್ರಜಾಸತ್ತಾತ್ಮಕ ವಿಧಾನದಲ್ಲೆ ಬದಲಿ ಆಯ್ಕೆಯನ್ನು ಸೂಚಿಸಬಹುದು. ಪ್ರಸ್ತುತ ತಮ್ಮ ಅಜ್ಜನ ಕಾಲದಿಂದಲೂ ಮಹಾತ್ಮಾ ಗಾಂಧಿಯವರ ಅನುಯಾಯಿಗಳ ಪರಂಪರೆಯನ್ನು ಹೊಂದಿರುವ ಶ್ರೀಧರ ಜಿ. ಭಿಡೆ ಅವರು ಮಾತೃ ಸಮಿತಿಯ ಅಧ್ಯಕ್ಷರಾಗಿದ್ದಾರೆ. ಪುತ್ತೂರು, ಸುಳ್ಯ, ಬೆಳ್ತಂಗಡಿ, ಕಡಬ, ಮೂಡುಬಿದಿರೆ, ಮಂಗಳೂರು, ಕಾರ್ಕಳ, ಉಡುಪಿ, ಬ್ರಹ್ಮಾವರ, ಮೈಸೂರು, ಕಲಬುರ್ಗಿಗಳಲ್ಲಿ ಗಾಂಧಿ ವಿಚಾರ ವೇದಿಕೆಯ ಘಟಕಗಳು ಕೆಲಸ ಕಾರ್ಯಗಳನ್ನು ಮಾಡುತ್ತಿವೆ. ಭಾರತದ ಯಾವ ಭಾಗದಲ್ಲಿ ಬೇಕಾದರೂ ಇದರ ಘಟಕಗಳನ್ನು ತೆರೆಯಬಹುದು.

ಇದು ಯಾವುದೇ ರಾಜಕೀಯ ಸಿದ್ಧಾಂತಗಳಿಗೆ ಬದ್ಧವಲ್ಲದ, ರಾಜಕೀಯ ಉದ್ದೇಶಗಳಿಗಾಗಿ ಕೆಲಸ ಮಾಡದ ವೇದಿಕೆಯಾಗಿದ್ದು ಎಲ್ಲರನ್ನೂ ಒಳಗೊಳ್ಳುವ ಗಾಂಧೀಜಿಯವರ ಚಿಂತನೆಗಳ ವ್ಯಾಪ್ತಿಯಲ್ಲಿ ಕೆಲಸ ಮಾಡುತ್ತದೆ. ಜನರಲ್ಲಿ ಅರಿವನ್ನು ಹೆಚ್ಚಿಸುವುದಕ್ಕಾಗಿ ಕೆಲಸ ಮಾಡುವುದೇ ವೇದಿಕೆಯ ಗುರಿಯಾಗಿದೆ. ಈ ಗುರಿಯನ್ನು ಸಾಧಿಸಲು ಗಾಂಧೀಜಿಯವರ ಚಿಂತನೆಗಳ ಆಚೆಗೂ ವೇದಿಕೆಯು ಕೆಲಸವನ್ನು ಮಾಡುತ್ತದೆ. ಅಂದರೆ ಗಾಂಧಿ ವಿಚಾರ ವೇದಿಕೆಯ ಆಶ್ರಯದಲ್ಲಿ ಅಂಬೇಡ್ಕರ್, ಲೋಹಿಯಾ, ಅರವಿಂದರು, ಜವಾಗರ ಲಾಲ್ ನೆಹರೂ, ದೀನ ದಯಾಳ್ ಉಪಾಧ್ಯಾಯ, ಜಿಡ್ಡು ಕೃಷ್ಣಮೂರ್ತಿ ಹೀಗೆ ಇತರ ಯಾರ ಚಿಂತನೆಗಳ ಕುರಿತಾಗಿಯೂ ಕೆಲಸವನ್ನು ಮಾಡಬಹುದಾಗಿದೆ. ಇನ್ನಿತರೇ ವಿಷಯಗಳ ಬಗ್ಗೆಯೂ ಕೆಲಸ ಮಾಡುತ್ತದೆ. ಅಂದರೆ ವೇದಿಕೆಯು ಗಾಂಧೀಜಿಯವರ ವಿಚಾರಕ್ಕೆ ಮಾತ್ರ ಸೀಮಿತವಾಗಿಲ್ಲ.

ಎಲ್ಲ ಧರ್ಮೀಯರು, ಎಲ್ಲ ಜಾತಿಯವರು, ಸ್ತ್ರೀ-ಪುರುಷ-ತೃತೀಯ ಲಿಂಗಿಗಳೆಲ್ಲರೂ ಪರಸ್ಪರ ಸಮ ಭಾವದಿಂದ ಅನ್ಯೋನ್ಯವಾಗಿ ಬದುಕಬೇಕು, ಜನ ಜೀವನದಲ್ಲಿ ನೈತಿಕತೆ ಮತ್ತು‌ ಜೀವನ ಮೌಲ್ಯಗಳು ಹೆಚ್ಚಬೇಕು, ಆರ್ಥಿಕ ಗಳಿಕೆಗಾಗಿ ಪ್ರತಿಯೊಬ್ಬರಲ್ಲೂ ಏನಾದರೊಂದು ಕೌಶಲವಿರಬೇಕು, ಆರ್ಥಿಕ ಸ್ವಾವಲಂಬನೆಯನ್ನು ಸಾಧಿಸಬೇಕು, ಸರಳ ಜೀವನ-ಉದಾತ್ತ ಚಿಂತನೆ ಸಾಧ್ಯವಾಗಬೇಕು, ಸಮಸ್ಯೆಗಳನ್ನು ಮಾತುಕತೆಯ ಮೂಲಕ ಬಗೆಹರಿಸಿಕೊಳ್ಳಲು ಸಾಧ್ಯವಾಗಬೇಕು, ವ್ಯಕ್ತಿ ಸ್ವಾತಂತ್ರ್ತವನ್ನು ರಕ್ಷಿಸಬೇಕು, ದಾಸ್ಯ ಪ್ರವೃತ್ತಿ ಇರಬಾರದು, ಪರಿಸರವನ್ನು ರಕ್ಷಿಸಬೇಕು, ಪರಂಪರೆಯನ್ನು ಪೋಷಿಸಬೇಕು, ರಾಷ್ಟ್ರೀಯ ಸಮಗ್ರತೆಯನ್ನು ಕಾಪಾಡಿಕೊಳ್ಳಬೇಕು, ಕಲೆ-ಸಾಹಿತ್ಯ-ಸಂಸ್ಕೃತಿ-ವೈಜ್ಞಾನಿಕ ದೃಷ್ಟಿಕೋನವನ್ನು ಹೆಚ್ಚಿಸಿಕೊಳ್ಳಬೇಕು, ತಾರತಮ್ಯವನ್ನು ನಿವಾರಿಸಬೇಕು ಎಂಬಿತ್ಯಾದಿ ವಿಷಯಗಳು ಗಾಂಧಿ ವಿಚಾರ ವೇದಿಕೆಯ ಆಶಯವಾಗಿದೆ. ಒಳ್ಳೆಯ ಸರಕಾರಗಳು ಒಳ್ಳೆಯ ಜನರಿಂದ ಬರುತ್ತವೆ. ಆದ್ದರಿಂದ ಜನರ ಗುಣ ಮಟ್ಟವು ಹೆಚ್ಚುವುದೇ ಮುಖ್ಯ ಎಂದು ಗಾಂಧಿ ವಿಚಾರ ವೇದಿಕೆಯು ನಂಬುತ್ತದೆ.

ಪ್ರಸ್ತುತ ಅಂಕಗಳನ್ನು ಕೇಂದ್ರೀಕರಿಸಿದ ಶಿಕ್ಷಣವು ಯಾಂತ್ರಿಕವಾಗುತ್ತಾ ಹೋಗುತ್ತಿದ್ದು ಶಿಕ್ಷಣದಲ್ಲಿ ಸಂವಾದದ ಕೊರತೆ ಉಂಟಾಗಿದೆ. ಸಾಮಾಜಿಕ ಜೀವನದಲ್ಲಿಯೂ ತಾನೇ ಗೆಲ್ಲಬೇಕೆಂದು ಮಾಡುವ ಅರ್ಥಹೀನ ವಾದಗಳೇ ಸಂವಾದಗಳೆನಿಸಿವೆ. ವಿಚಾರ ಗೋಷ್ಠಿಗಳು ಹೆಚ್ಚು ಜನರನ್ನು ಸೇರಿಸಿ ಮಾಡುವ ಏಕ ಮುಖಿ ಭಾಷಣಗಳಾಗಿದ್ದು ವಿಚಾರಗಳು ಯಾರನ್ನೂ ತಲುಪುವುದಿಲ್ಲ. ಇಂತಹ ಸಂದರ್ಭದಲ್ಲಿ ಇನ್ನೊಬ್ಬರ ಮಾತನ್ನೂ ಆಲಿಸುವ ಪ್ರವೃತ್ತಿಯನ್ನು ಬೆಳೆಯಿಸುವ, ವಿಚಾರವನ್ನು ಎಲ್ಲರೂ ಕೇಳಿಸಿಕೊಳ್ಳುವ 10-40 ಜನರ ಒಳಗೆ ಇರುವ ಸಣ್ಣ ಸಣ್ಣ ತಂಡಗಳಲ್ಲಿ ಮುಕ್ತ ಸಂವಾದವನ್ನು ವೇದಿಕೆಯು ನಡೆಸುತ್ತಿದೆ. ಈ ರೀತಿಯ ಸಾಕಷ್ಟು ‘ ಮನೆ ಸಂವಾದ’ ಗಳನ್ನು ವೇದಿಕೆಯು ನಡೆಸಿದೆ. ಒಂದು ಗ್ರಾಮ ಸಂವಾದವನ್ನು ನಡೆಸಿದೆ. ವೇದಿಕೆಯ ಅಸ್ತಿತ್ವವನ್ನು ಎಲ್ಲರ ಗಮನಕ್ಕೂ ತರಬೇಕಾಗಿದ್ದಾಗ ಆ ಉದ್ದೇಶಕ್ಕಾಗಿ ಮಾತ್ರ ಬೃಹತ್ ಸಮ್ಮೇಳನಗಳನ್ನು‌ ನಡೆಸಲು ಅವಕಾಶವಿದೆ. ಈ ಸಂವಾದಗಳು ಆರ್ಥಿಕ ಸ್ವಾವಲಂಬನೆ, ಜೀವನ ಮೌಲ್ಯಗಳು, ಪರಸ್ಪರ ಸದ್ಭಾವನೆ, ಜಿಜ್ಞಾಸು ಪ್ರವೃತ್ತಿ ಮುಂತಾದವಕ್ಕೆ ಸಂಬಂಧಿಸಿರುತ್ತದೆ. ಸಾಮಾಜಿಕ ಜಾಲತಾಣಗಳ ಬಳಕೆ ಇಲ್ಲದೆ ನೇರವಾಗಿ ಒಬ್ಬರ ಮನೆಗೆ ಹಲವರು ಹೋಗಿ ನಡೆಸುವ ಸಂವಾದಗಳು ಮನುಷ್ಯ ಸಂಬಂಧಗಳನ್ನು ಅಭಿವೃದ್ಧಿಪಡಿಸುತ್ತವೆ. ಇಡೀ ಕುಟುಂಬವನ್ನೆ ವೈಚಾರಿಕವಾಗಿ ಉನ್ನತೀಕರಿಸುತ್ತದೆ. ವಿಚಾರವನ್ನು ಸಮರ್ಪಕವಾಗಿ ಹೇಳುವ ವಿಧಾನವನ್ನು ಕಲಿಸುತ್ತದೆ. ಮುಂದಿನ ದಿನಗಳಲ್ಲಿ ಗಾಂಧಿ ವನದ ನಿರ್ಮಾಣ, ಆ ವನದ ಉತ್ಪನ್ನಗಳಿಂದ ಸ್ಥಳೀಯ ಉತ್ಪಾದನೆಗಳನ್ನು ಮಾಡಿ ಮಾರಾಟ ಮಾಡುವುದು, ದೇಶೀಯ ಆರ್ಥಿಕ ಘಟಕಗಳ ಉತ್ಪಾದನಾ ಕೌಶಲವನ್ನು ಕಲಿಸುವುದು, ಅನುಕೂಲವಾದರೆ ರಾಜ್ಯದ ನಾನಾ ಭಾಗಗಳಿಂದ ಪದವಿ ಮುಗಿಸಿದ ವಿದ್ಯಾರ್ಥಿಗಳನ್ನು ಅಸಹ್ವಾನಿಸಿ ಉದ್ಯೋಗ ಶಿಕ್ಷಣವನ್ನು ನೀಡುವುದರೊಂದಿಗೆ, ಗಾಂಧಿ ತತ್ವಗಳು ಮತ್ತು ವೇದಿಕೆಯ ಆಶಯವನ್ನು ಅವರಲ್ಲಿ ಬೆಳೆಯಿಸುವ ಯೋಜನೆಗಳಿವೆ.

ಪ್ರಸ್ತುತ ಮೂರು ಮುಖ್ಯ ಯೋಜನೆಗಳನ್ನು ಕೈಗೆತ್ತಿಕೊಳ್ಳಲಾಗಿದೆ. ಗಾಂಧೀಜಿಯವರ ಕುರಿತಾಗಿ ಇರುವ ಅನೇಕ ಪ್ರಶ್ನೆಗಳನ್ನು ಸಾರ್ವಜನಿಕರಿಂದ ಆಹ್ವಾನಿಸಿ ಅವುಗಳಿಗೆ ತಜ್ಞ ಸಂಪನ್ಮೂಲ ವ್ಯಕ್ತಿಗಳು ಕೊಟ್ಟ ಉತ್ತರಗಳನ್ನು ಪುಸ್ತಕ ರೂಪದಲ್ಲಿ ಪ್ರಕಟಿಸಿ ಜನರಿಗೆ ತಲುಪಿಸುವುದು.‌ ಎರಡನೆಯದು ವೇದಿಕೆಯ ಸದಸ್ಯರ ಚಿಂತನಾ ಸಾಮರ್ಥ್ಯದ ಹೆಚ್ಚಳಕ್ಕಾಗಿ ರೂಪಿಸಿದ ಯೋಜನೆಯಾಗಿದೆ. ಸದಸ್ಯರಿಗೆ ಇದರಲ್ಲಿ ಆದ್ಯತೆ ಇದ್ದು ಅವರು ಗಾಂಧೀಜಿಗೆ ಮತ್ತು ವೇದಿಕೆಯ ಆಶಯಕ್ಕೆ ತಕ್ಕಂತೆ ಬರೆದ ಲೇಖನಗಳ ಸಂಕಲನವನ್ನು ಪ್ರಕಟಿಸಲಾಗುತ್ತದೆ. ಮುಂದೆ ಇವರು ಸಮರ್ಥ ಲೇಖಕರಾಗಿ ಬೆಳೆಯಬೇಕೆಂಬುದು ವೇದಿಕೆಯ ಆಶಯವಾಗಿದೆ. ಮೂರನೆಯದು ವೇದಿಕೆಯ ಸದಸ್ಯರಾದ ಛಾಯಾ ಉಪಾಧ್ಯಾಯ ಅವರು ಸಂಗ್ರಹಿಸಿರುವ, ಗಾಂಧೀಜಿಯವರು ಅವರ ಕಾಲದ ಯುವ ಜನತೆಯ ಪ್ರಶ್ನೆಗಳಿಗೆ ಕೊಟ್ಟಿರುವ ಉತ್ತರವನ್ನು ಪುಸ್ತಕ ರೂಪದಲ್ಲಿ ಪ್ರಕಟಿಸುವುದಾಗಿದೆ.

ಸದ್ಯ ವೇದಿಕೆಯ ಕೆಲಸ ಕಾರ್ಯಗಳು ಹೀಗಿದ್ದರೂ ಮುಂದಿನ ದಿನಗಳಲ್ಲಿ ಅವಶ್ಯಕತೆಗೆ ತಕ್ಕಂತೆ ವಿಸ್ತರಿಸಲು ಅವಕಾಶವಿದೆ. ವೇದಿಕೆಯ ಘಟಕವನ್ನು ತಮ್ಮ ತಾಲೂಕಿನಲ್ಲಿ ತೆರೆಯಲು ಬಯಸಿದವರು ಚಂದ್ರಣ್ಣ ಎನ್. ಎಸ್, ಕ್ಯಾತನಹಳ್ಳಿ, ಮಂಡ್ಯ (ದಕ್ಷಿಣ ಕರ್ನಾಟಕ ಸಂಯೋಜಕರು-9741320777), ನೇತಾಜಿ ಗಾಂಧಿ, ವಿಜಾಪುರ(ಉತ್ತರ ಕರ್ನಾಟಕ ಸಂಯೋಜಕರು-9380569849), ಮುಷ್ತಾಕ್ ಹೆನ್ನಾಬೈಲ್, ಸಿದ್ಧಾಪುರ (ಮಧ್ಯ ಕರ್ನಾಟಕ ಸಂಯೋಜಕರು-9448027773), ಕಾಂಚೋಡು ಗೋಪಾಲಕೃಷ್ಣ (ಸಮನ್ವಯಕಾರರು-9980249568), ಭಾಗ್ಯೇಶ್ ರೈ(ಆಡಳಿತಾಧಿಕಾರಿ-9620468869), ಅರವಿಂದ ಚೊಕ್ಕಾಡಿ (ಪ್ರಧಾನ ಕಾರ್ಯದರ್ಶಿ-9740688698) ಇವರಲ್ಲಿ ಯಾರನ್ನಾದರೂ ಸಂಪರ್ಕಿಸಬಹುದು.

—————————————————-